HBSC ESPAÑA

O estudo Health Behaviour in School-aged Children (HBSC) iníciase como estudo internacional en 1982 coa iniciativa de investigadores de tres países (Finlandia, Inglaterra e Noruega) que acordaron deseñar un instrumento común que permitise coñecer os hábitos de vida relacionados coa saúde dos preadolescentes e adolescentes escolarizados. Moi pouco tempo despois o estudo é acollido como Estudo Colaborador pola Oficina Rexional para Europa da Organización Mundial da Saúde (WHO Collaborative Study) e en 1983-84 iníciase a primeira recollida de datos nestes tres países, máis Austria que se acababa de incorporar ao proxecto.

A partir de 1985, e como o reflicte a Táboa 1, o HBSC consistiu basicamente en planificar cada catro anos unha nova recollida de datos que permitiu coñecer as tendencias evolutivas en cada un deses países respecto a determinados aspectos dos estilos de vida dos adolescentes, así como as comparacións entre eles. Como pode apreciarse na devandita táboa, co paso do tempo, o estudo foi incluíndo máis países europeos, así como países e territorios extraeuropeos (Australia, Canadá, Grenlandia, USA). De igual xeito, España participou en todas as edicións do estudo, excepto na inicial e na de 1997-98.